Hier een voorproef:
Luustern
Ik heur mien spraoke
Dow mien moe heur bèlken
Da’k niet zo gauw bentern mos
De stienen bunt ja slim glèr
Ik heur mien spraoke
Dow mien moe ’t aovendbrood opschepte
Dow mien va knärpend in ’t end kump
Um zich ’n beker melk te kriegen
Ik heur mien spraoke
Achter mien rèkener
Altemaole up ’n aander stee in de wèrld
Mor deur de koptillefoon stuufbi’j
Ik heur mien spraoke
As de trein knärsend op Ommen stille stiet
En de deure glipt lös
En ’n voggel glidt aover
Ik heur mien spraoke
As ik mit ‘t twi’jduustern op huus an gao
En weurde zwalmt smeu
Vanuut ’t veurhuus de deel aover
Ik heur mien spraoke
In ’t ochtendstinnen
Mien olde bienen stief
Oen kolde voeten onder mienent
Ik heur mien spraoke
As ik naost mien wichie stao
Mien haand op heur scholder
En ze zegt ‘Jao’
Ik heur mien spraoke
Veur de leste maol
As ik mien aosem
Staorigan uutpoest
Arjan Sterken